За оние кои никогаш не го читале Гијом Мисо
Ретко кој нема слушнато за овој француски писател, особено кај нас, со оглед на тоа дека многу од неговите книги се преведени и на македонски јазик и можат да се најдат низ нашите книжарници. Сè почесто ги среќавам неговите наслови меѓу прочитаните книги за кои се пишува на форумите и фејсбук групите и сè повеќе добивам препораки и слушам за неговите романи.
Првата негова книга ја прочитав летото 2009 година и сè уште се сеќавам на одредени настани, што е доволен доказ за тоа колку голем впечаток ми оставила. А за оние кои никогаш не го читале Мисо, во продолжение следи кратка рецензија за три негови книги.
Затоа што те љубам ја раскажува приказната за малата Лајла која еден ден исчезнува во трговски центар, без никаква трага зад себе. Нејзините родители се избезумени, а неможејќи да ја пронајдат, запаѓаат во очај и тага. Чувствувајќи дека неговиот живот повеќе нема смисла, таткото на Лајла почнува да скита низ улиците на Њујорк и станува бездомник. Но, точно 5 години од нејзиното исчезнување, Лајла се појавува на истото место. Каде и со кого била тие години, никој не може да дознае.
Ова беше книгата со која го запознав Мисо и добро се сеќавам дека не можев да ја испуштам од раце. Настаните постојано ми го задржуваа вниманието, раскажувањето течеше лесно и навидум смирено, за веќе во следниот момент да има таков пресврт, што останував подзината. Во никој случај не можев да ги предвидам случувањата, а ниту крајот кој ме остави запрепастена.
Главен лик во Девојката од хартија е светски познатиот писател Том Бојд, кој поради љубовна болка запаѓа во деспресија и престанува да пишува. Откако нема да успее да стави крај на животот предозирајќи се со апчиња, Том се буди во својата вила во Малибу каде го чека Били – женски лик од неговиот популарен роман. Од тој момент целиот негов живот се менува.
Книгата брзо се чита, страниците летаат една по друга, нема досадни моменти, ниту застој во приказната. Можеби крајот би го променила, некако имав чувство дека Мисо се исплашил од целата фантазија во книгата, па решил така да ја заврши. И малку изгубив трпение во последните глави, цело време си викав ајде нека се разреши приказната, ама наместо тоа добив еден куп нови ликови 😀
Што се однесува до Девојката од хартија, уште кога го прочитав насловот имав некаква идеја во глава. Мислам дека не ја доживеав како повеќето што ја читале, бидејќи пред да ја читам го имав изгледано филмот Ruby Sparks. Настаните се слични, мене дури во филмот приказната ми е поинтересна, а пораката посилна. Како што ја читав книгата, така ја споредував со филмот, па мислам дека тоа ми ги расипа импресиите.
Во секој случај, интересна книга, прво ви препорачувам да ја прочитате, а потоа да го изгледате и филмот Ruby Sparks.
А потоа раскажува за Нејтан – човек кој имал тежок живот, но поради неговата амбициозност успева да стане познат адвокат и да излезе од сиромаштијата. Желбата за сè повеќе пари и што поголем успех во професијата, се една од причините за разнишување на неговиот брак кој завршува со развод. Во неговиот живот се случува целосен пресврт кога ќе запознае човек-гласник кој доаѓа кај луѓето кои наскоро ќе умрат. Воден од мислата дека не му преостанува уште многу, Нејтан се обидува да ги надомести пропуштените шанси и да ги поправи грешките од минатото.
Книгата брзо и лесно се чита, како и другите дела на Мисо. Ликовите би рекла дека добри се изградени, приказната не е лоша, ама не е ни нешто кое ме остави воодушевена. Од сите три наведени книги, оваа ми се допадна најмалку и после неа застанав со Мисо.
Можеби некогаш ќе му се вратам, веќе имам неколку негови книги на ум кои би ги читала, ама понатаму. Само едно знам – нема да го читам на македонски јазик. Тие што го читале претходно, знаат колку ужасни преводи имаат неговите книги и нажалост, можеби поинаку ќе сум ги доживеала неговите приказни ако впечатокот не ми го расипел лошиот превод.
Бонус: Прочитајте ги статиите за „Апартман во Париз“, „Ако не постои утре“ и „Тајниот живот на писателите“.
